Rev 8 | KPG | STEP | Di madagoaa hua Ta maa siibi ne huge di hidu noo, gei di langi gu kila loo holongo di baahi aawaa.

a 8.3:Amos 9.1; Ex 30.1, 3

b 8.5:Lev 16.12; Ezek 10.2; Ex 19.16; Rev 11.19, 16.18

c 8.7:Ex 9.23-25; Ezek 38.22

d 8.10:Is 14.12

e 8.11:Jer 9.15

f 8.12:Is 13.10; Ezek 32.7; Joel 2.10, 31, 3.15

Revelation of John 8

Di hidu noo

1 Di madagoaa hua Ta maa siibi ne huge di hidu noo, gei di langi gu kila loo holongo di baahi aawaa. 2 Gei au ga mmada gi digau di langi dogohidu, e tuu i mua o God. Digaula gu wanga ginai nia buu-‘trumpet’ e hidu. 3 Gei tuai dangada di langi dela e daahi dana boolo goolo dudu mee haga kala, gu hanimoi, ga duu i di gowaa dudu tigidaumaha. Gei mee ga wanga ginai nia mee haga kala-‘incense’ e logo belee haga puni ang gi nia dalodalo o nia daangada a God huogodoo, mo di wanga nia ‘incense’ i hongo di gowaa dudu tigidaumaha goolo, dela e duu i mua di lohongo king. ^a 4 Nia huiahi o nia mee haga kala ala e dudu, la ga hula gi nua mai laa lodo nia lima o tangada di langi dela e duu i mua o God, e haga puni ang gi nia dalodalo o nia daangada a God. 5 Tangada di langi ga kae di boolo dudu mee haga kala, ga haa ginai di ahi mai di gowaa dudu tigidaumaha, ga hudu ia gi hongo henuailala. Di madagoaa deelaa, gei nia lee llauehe, nia lee atili, nia ila ga dabadaba, mo di ngalungalua tenua ga hai. ^b

Nia buu-‘trumpet’

6 Nomuli, gei digau di langi dogohidu mo nadau buu-‘trumpet’ e hidu ga hagatogomaalia e ili nia maa.

7 Togo dahi dangada di langi ga ili dana buu-‘trumpet’. Gei di kolii mo dono ahi, e unugi gi nia dodo ga doo ia gi hongo henuailala. Dahi baahi e dolu o henuailala ga wwele, ge dahi baahi e dolu o nia laagau ga wwele, gei nia geinga ala i golo la ga wwele labelaa. ^c

8 Togolua dangada di langi ga ili dana buu-‘trumpet’. Gei di mee dela e hai gadoo be di gonduu wele damana la ga hudu gi lodo di moana. Dahi baahi e dolu o di moana la gu hai nia dodo, 9 ge dahi baahi e dolu o nia manu mouli i lodo di moana la gu mmade, ge dahi baahi e dolu o nia wagabaalii la gu mooho.

10 Togodolu dangada di langi ga ili dana buu-‘trumpet’. Gei di heduu damana e ula gadoo be di lama ulaula, ga doo ia i di langi gi hongo dahi baahi e dolu o nia monowai mmidi mo i hongo nia monowai geli. ^d 11 (Di ingoo o di heduu deelaa la go “Mmala”.) Dahi baahi e dolu o nia wai la gu mmala, gei nia daangada dogologo ala ne inu nia wai la gu mmade, idimaa, nia wai la gu mmala. ^e

12 Togohaa dangada di langi ga ili dana buu-‘trumpet’. Gei dahi baahi e dolu o di laa, dahi baahi e dolu o di malama, dahi baahi e dolu o nia heduu la gu dugidugi gu momooho, ga hidi mai ai dahi baahi e dolu o nadau maahina la gu bouli. Dahi baahi e dolu o di aa mo dahi baahi e dolu o di boo la gu deai nau maahina ai. ^f

13 Nomuli, gei au ga mmada, ga longono di manu-‘eagle’ e maangi i nua i lodo di ahiaalangi, e helekai dono lee gi nua boloo,

“E hagamadagudagu dangada, e hagamadagudagu dangada! E hagamadagudagu dangada huoloo ang gi digau ala e noho i hongo henuailala i di madagoaa o nia lee-‘trumpet’ ala ma ga ili go digau di langi dogodolu ala i golo!”